HOMENAXE DO IES A SANGRIÑA A MANOEL DE OLIVEIRA

As alumnas e alumnos do Socheo Educativo, grupo de reflexión e creación audiovisual dos I.E.S. A Sangriña da Guarda (Galiza), fixeron un vídeo homenaxe ao grande mestre do cinema Manoel de Oliveira. O director portugués finou o pasado 2 de abril na súa casa do Porto aos 106 anos de idade.

A nova da súa morte foi transmitida aos alumnos que serviu para ampliar o coñecemento sobre tan insigne creador. Repasouse toda a súa vida, obra e concepción cinematográfica, mais o dato que máis lle chocou foi que estudara, fai case un século, a pouca distancia da súa escola.

Este dato biográfico foi o que motivou aos rapaces a facer este homenaxe urxente, o primeiro que se lle dedica desde o Concello da Guarda. Os rapaces escolleron a canción do Aniki Bobó (1941), o seu filme sobre o mundo da infancia, e gravaron o estado actual do colexio dos xesuítas da Pasaxe (Camposancos) onde Manoel de Oliveira estudou internado desde 1919 a 1923.

AIRES DA GUARDA (1958)

“Aires de mi tierra” é unha curtametraxe en cor do ano 1958, dirixida por Alberto Conde. Unha produción realizada ao abeiro do NODO onde se da conta do regreso dun emigrado a Galicia. Na viaxe por Galicia enfía distintos sitios emblemáticos, tamén da Guarda, onde destaca a cima e as vistas desde o Trega.

BOTADURA DO OLATRANE NOS ASTELEIROS DA PASAXE (1965)

Nova gravación coa vinculación mariñeira da Guarda. Fragmento dun NODO que fai referencia á “Botadura del Oltrane en La Guardia”. Unha reportaxe realizada en 1965 que leva a sinatura de 1172-A e ten unha duración de 49 metros. Nesta película recóllese a botadura dunha carabela nos asteleiros de Joaquín Castro na Pasaxe. O destino, o Río Miño e o Atlántico…

Novos vídeos de José Quintás Núñez: As Eiras e Forno do Duque

Paseos por Eiras no 1977 e na ribeira do río Miño a altura do Forno do Duque no ano 1979. . José Quintas Núñez fixo unha serie filmes a finais da década dos 70. A parte de recoller escenas familiares tamén estivo atento a recoller costumes e paisaxes daquela altura.

VIAXE ATÉ O MONTE TREGA (1953-58)

Un novo documento clave do audiovisual da Guarda e do Baixo Miño.

Manuel Arís Torres, natural de Poio (1920), emigrara de neno cos seus pais a Montevideo. No Uruguai, a máis de manter unha estreita relación cos emigrantes no período que traballou como xerente no Centro Galego de Montevideo, chegou a traballar no cinema profesional charrúa. A partir de 1953 realiza varias viaxes a Galicia coa súa cámara Bolex de 16 mm, coa que filmará “Viaje por Galicia” (1953-58). Un filme que continúa co esquema do documental originado na emigración, continuando a tradición de José Gil e que continuarán no outro lado do Atlántico Eligio González, Manuel Arís e Armando Hermida Luaces.

Gracias a Luis A. Martínez Sobrino por colaborar con Proxecto Socheo!

PRAIA DOS MUÍÑOS (1976), DE ENRIQUE BARREIRO

Película familiar que filmou Enrique Barreiro cando el e a súa familia disfrutaron dunha xornada de praia nos Muiños no ano 1976.

PASEO POLA PRAIA DAS EIRAS, DE ENRIQUE BARREIRO (1976)

Película familiar que filmou Enrique Barreiro sobre un paseo na praia das Eiras en 1976. Nela podemos ver como un avó pasea cos netos e un can pola ribeira do Miño.

Ratas embarcando para A Guarda

Fragmento do telefilme “O bosque de Levas”, dirixida por Antón Dobao en 2006. Nestas imaxes recollen unha viaxe no ferry entre A Guarda e Caminha. Todo é placidez e beleza mais nada fai agardar que atravesía remate cunha desagradable sorpresa.

Vivi-lo mar: vampiros mergullados

Programa de televisión dedicado á pesca da lamprea no río Miño que acontece nas súas augas dede xaneiro a abril. A reportaxe comeza na barra da foz do Miño e remonta o río parándose nas distintas maneiras de capturar este peixe ate chegar ao primeiro encoro. Este percorrido está salpicado de apuntamentos respecto a aspectos biolóxicos, comercialización, históricos e gastronómicos aque gravitan sobre esta curiosa especie que cada vez quedan menos rios galegos que contan coa súa presenza. Gravación facilitada por Barcos da Guarda.

O Fío do Río Miño

Na Guarda acontece un fenómeno da natureza moi peculiar. Unha marca de auga procedente do Río Miño avanza polo mar cando baixa a marea; a auga doce permanece na superficie, distinguíndose da salgada. Esta marca, segundo ventos e correntes, pode avanzar varios quilómetros mesmo até a praia da Area Grande ou entrar polo porto da Guarda. A este fenómeno chámase, tradicionalmente “o fío do río”.