Chegamos ao final do Fondo Bixurro coa quinta entrega da colección e, como non, volvemos ao Desfile da Festa do Monte, mais desta vez no ano 1981. Nela podemos ver a José Elías Robollar e familia polo que aproveitamos a ocasión para facerlle público, unha vez máis, o noso agradecemento.
Cuarta entrega do Fondo Bixurro e nela podemos ver unha escena familiar (con continuos desenfoques) no aparcamento da praia dos Muíños e cun resol propio dunha tarde de inverno. Os rapaces teñen moitos xoguetes, será o Día de Reis?
Segunda entrega do Fondo Bixurro e ímonos ao 1976 a pasar unha xornada de praia nos Muíños. Interesante ver a indumentaria e o equipamento praiero daquela época e disfrutar dunha vista de Portugal e da foz do Miño.
Noutras ocasións xa nos tíñamos decatado: o abondoso número de cámaras de Súper 8 que intentaban inmortalizar o Desfile da Festa do Monte. Pero quizais, sexa co filme de Desfile da Festa do Monte (1978) do Fondo Bixurro onde máis cámaras de cinema doméstico aparecen. Deste xeito, moitas veces a nosa mirada vai alén do que acontece no centro do plano e moitas veces vai parar ao que aparece polos laterais. A modo de conclusión podemos dicir que esta cita festiva da Guarda congregaba a moitos cineastas afeccionados, sobre todo desde os anos que van desde o 1976 ao 1981, período de gran esplendor do formato.
Comezamos a ver o Fondo Bixurro e abrimos cun motivo clásico dentro do cinema local da Guarda: o Desfile da Festa do Monte, desta vez do ano 1978. Grazas a José Elías Rebollar Vega e familia pola súa xenerosidade!
Proxecto Socheo 